對於這次的買不買CD討論，筆者正打算寫第二篇文章討論之際，發現高登巴打偷偷感激你以精簡易消化亦十分sensible方法回顧不少銷量差但求突破的唱片，亦對本站筆者作出提醒。文章啜核有道理，特此轉載。
偷偷感激你: 好聽既一定要買
如果好聽 人人大讚 但又唔買碟 後果會係 A)唱片公司向市場妥協, 下隻碟出K歌補救局面, B)繼續堅持音樂路線, 銷量繼續仆直, C)冇下次
特別係3cmusic呢類網站寫得樂評, 我會期望可以對好音樂有更多良心, 對於有口碑但銷量唔好(即係文中講到既跌價) 有更多支持. 當然, 陳偉霆, 泳兒, 容祖兒, twins等人既唱片係值得全力抵制既.
A) 例子
梁漢文 2003/03四季
呢隻EP銷量真係衰到貼地(連簽名會都要派碟比人拎去簽), 所以04年出既大碟大部分都係K歌, 希望挽救銷量, 音樂就一定冇咁比心機, 05年直情消失, 近年都已經處於消失狀態.
關心妍 2006/Jade Loves
自從去左太古廣場之後, 家姐既事業就一沉不起, 06年呢張碟決定放棄K歌來一個音樂大改革, 於是剪頭髮轉形象, 由老土阿姐變左高登仔都會J既家姐研. 有一首玉石樂隊播起左, 碟入面其他歌都好聽, 唱腔被徹底調教, 編曲亦用心機, 可惜銷量不濟, 於是07年下一張碟就全面改走k歌, 不過如何離開你照樣紅唔起, 再過一年08年尾仲發生搶獎事件.
楊千嬅 2006/Unlimited
樂壇人瑞最後一張概念完整, 歌詞出眾, 設計用心, 兼且自己一手揀歌既大碟(今年年頭果隻得8首歌). 呢張碟將怨婦精神發揮到極致, 將中女嫁唔出結合楊千嬅一直最擅長既小文藝, 亦舒d書名都出現幾次. 憑住楊千嬅十年老本呢隻碟賣得唔算好差, 不過都唔算好, 間接促成07年楊千嬅全碟改走商業路線, 可惜黎天王既品味有眼光, 商業歌都唔好聽.
何韻詩 2008/Ten days in the madhouse
坦白講, 呢隻碟既音樂並唔好聽. 但何韻詩呢張唱片贏既係精神, 有邊個仲稱得上係一線尾既歌星夠膽用全年時間, 係12月既年尾黃金時間, 出一隻碟, 10首歌全部都係關心社會入面唔同既人, 仲要出埋紀錄片+免費音樂會咁做成件事架? 不過呢種為社會講少少野既精神冇獲得市場認同, 因為佢剪左新髮型, 比木紋既佢更加tb, 新碟低見49蚊. 09年演唱會銷量仆直, 出現傳聞中既5蚊飛, 結果趕左何韻詩過台灣吊命, 同埋要出隻叫做鋼鐵是怎樣煉成的既K歌, 比較幸運既係佢真係憑呢隻歌hit番起少少.
B) 例子
王菀之 2009/On Wings of Time
樂評一面倒讚好, 口碑載道既一張大碟, 有hit歌月亮說, 但銷量唔理想, 幸好東亞唱片公司冇強逼王菀之即刻做k歌, 不過佢堅持自己音樂既同時, 銷量一路仆直, 唔知仲可以唱幾耐, 上年叫做有隻末日吊下命, 不過其實唔多hit.
麥浚龍 近年所有唱片
Juno銷量有改善過咩? 弱水三千多人識多人唱, 但唱碟銷量一樣唔見得好(唔, 隻精選算賣得唔錯既), 不過人地就好彩有音樂品味之餘, 最緊要有錢, 可以支撐到佢出咁多好聽, 唔理市場既歌, 如果唔係死向左走向右走左好耐.
C) 例子
盧巧音 2005/天演論
當年係一張嶄新概念大碟, 其實就唔算真係正到嘔, 有幾首都相當普通. 咁話哂陰姐早年氣盛, 加埋有隻露西算播得下, 可惜銷量照樣仆直, 07年轉會出左隻EP之後就永久沉寂, 早兩年聽聞仲開埋告別演唱會Stop la.
梁詠琪 2005/Look
好勝都算傳奇, 走到05年竟然仲有一次音樂蛻變, 講真你話驚天地泣鬼神又唔算, 但係敢於放棄過去音樂路線, 撞出唔錯既東西係幾值得嘉許既. 不過就正因為冇埋梁小姐既最後殺著(掛名創作K歌), 隻碟冇一首歌hit得起, 銷量亞太區有一天成為亞太區直之下, 配合同伊麵分手人人冷嘲熱諷, 06年再下一城出隻好聽舒服高質素怨婦大碟, 有隻十足林憶蓮既主打歌北京之夏都救唔返, 終於收埋皮.
劉美君 2009/Queen of hardships
prudence復出唔單止想開演唱會, 仲做全新廣東大碟, 係樂評之間口碑算唔錯, 不過就冇hit歌. 呢隻碟銷量奇差, 過冇幾耐經已出到49蚊特價, 而家全新一手價好似係9蚊. (但反而關淑怡09年隻碟好似唔太差) 結果直接促使劉美君而家要唱埋d翻唱大碟, 連戀愛大過天咁既垃圾都要翻唱成一首更差既物體.
平心而論, 以上唱片仆直不無道理, 因為佢地忽視一個最基本事實, 就係歌根本唔係用黎聽.
香港人鍾意乜野其實好清楚, 衛蘭既唱片永遠最好賣, 而最多人睇既演唱會係容祖兒演唱會.
點解黃偉文作品展可以成為咁大既話題? 因為30首歌個個都識唱, 大家可以一齊唱K.
所以容祖兒演唱會可以開12場4面台, 王菀之2場3面台都滯銷, 派飛? 其實大家都有派, 但點解容祖兒多咁多人睇(多成10倍!), 咪因為香港人愛唱k囉.
而如果係3cmusic出街, 我會期望係個隻寫文既樂評人可以對一d好聽但市場唔受落既唱片有更多認同, 願意付出金錢去回饋用心做音樂既人, 特別為左佢地銷量未必好, 而唔係抱怨佢地跌價.