巨聲效應天王天后師傅到

Face: 巨聲效應　天王天后師傅到

2009年11月25日

Miss Chan Chan（陳潔靈）逢週日晚狂插巨聲幫高音唔夠準、低音未夠甜，雖句句狠，但勝在字字到 point，巨聲幫得益不少。
正如 Miss Chan Chan話：「每個人都可以唱好歌！」技巧點練？無師自通固然好，但有名師指點自然行快好多！所以《 FACE》精選幾位星級歌唱老師畀大家，大爆傳授天王天后秘技，想做 Joey同 G.E.M.話咁易！

教埋陳總 Christine Samson

收費：一小時$850至$1,050
賣點： 60年代出名 D’Topnotes主音，天王天后御用老師。

本 地星級歌唱老師，首選竟然係中菲混血的 Christine Samson，除天后級容祖兒、謝安琪、何韻詩、 Twins和巨肺新人 G.E.M.搵佢學嘢，連鄧走音 Stephy同 TVB總經理陳志雲都搵佢上雞精班惡補，保守計算至少近 60名歌手及藝人都係佢門生。

同好多 歌唱老師一樣， Christine都係由歌手變老師， 60年代，佢係 6人樂隊 D’Topnotes主音（ Christine五兄弟姊妹及著名監製鍾定一為成員）， Christine 98年開始全職教學生，她說：「開初明星學生佔半數，可能係口碑啦，家學生幾乎全部係大明星。」據知想拜 Christine為師，至少要等到下年 3月， waiting list都有 2、 30人，勁過排隊買 LV。

跟咗 Christine，用氣有力咗，上高音位都穩咗好多，加上老師好有心機慢慢教，真係學到嘢！
Stephy初初上嚟學唱歌時音準的確差啲，不過佢學咗近一年，每堂會用半個鐘練音準，家明顯有改善，佢算進步最多！

Christine提我唔好講嘢咁激，以免傷聲。佢仲會每堂錄咗我嘅歌畀我返屋企聽，等我深刻記住邊啲位要留意！
G.E.M.年紀咁輕，唱歌好有 power，不過平時太易興奮講嘢會大聲咗，好易傷聲，所以我要求佢特別注意！

老師其實好 pro，佢除咗教我發聲，連嘴形、食物都教埋，唔畀我食辣嘢，要唱好歌，梗要聽話！
阿 Kay高音位有啲窄，雖然佢學咗冇耐，一上堂就同佢狂練高音位，只係學咗個幾月，家高位鬆好多！

超時上堂

記 者這天本來約了 Christine三點做訪問，結果三點半佢先教完學生， Christine話：「我平時都係會超時，上一個鐘堂會教足個幾鐘，有時學生未達到要求，超時好正常，唱好先走得！」其實教過咁多個明星， Christine就最欣賞容祖兒， Christine再說：「佢好勤力，每次都做筆記，邊粒字要用感情，都記低晒，佢唱快歌仲會邊跳邊唱， Joey話：『咁先聽到有冇喘氣！』真係好認真！」
除咗祖兒， Christine特別提起鄧走音 Stephy，大讚佢有進步， Christine續說：「 Stephy找我時（〈電燈膽〉走音後）好老實話想唱好高音，唔想走音，所以我不斷同佢練好音準，佢學咗近一年，高音明顯有進步，我知道佢係得，只係太大壓力！」

Christine位於銅鑼灣百德新街的 studio，由早上 11點至晚上 11時都排滿學生，連天后如容祖兒、陳志雲（右圖）都上門拜師（為之前《志雲飯局》舞台版唱歌），一個接一個，不過 Christine見學生有進步最開心，話唔覺得攰。

60年代 Christine（左）除咗係 D’Topnotes主音，仲係隊中 keyboard手，因為當時唔少酒廊騷，所以唱 live要求甚高：「冇咪嘴 o架！」

退教進修陳潔靈

收費：一小時$800
賣點：縱橫樂壇 35年，經驗老到。

邊個至係「超級巨聲」仲係未知之數，不過超級評判先行跑出！人人都 buy佢一針見血、個個都敢鬧嘅 Miss Chan Chan陳潔靈，可惜桃李滿門嘅 Miss Chan Chan話自己都要進修，退出教壇已經三年！

D’Topnotes 解散後，成員鍾定一搵埋陳潔靈組成 New Topnotes，陳潔靈入行做歌手近三十年，教齡都超過十年，曾教過陳慧琳、 Twins、祖兒同關心妍， Miss Chan Chan三年前唔再收生，決定自己做學生、學鋼琴、報讀美國聲樂課程，都係因為愈教愈覺得學海無涯：「我收生標準好簡單，有心唱歌就得，有教無類！

「不 過好似趙展彤（《巨聲》參賽者）得 11歲，我一定唔收！未變聲心智未成熟，學唱歌？我建議佢聽多幾年歌好過。我唔係學院派出身，教畀班學生都係咁多年自己上台經驗。我覺得真正需要進修係自 己，咪走去做番學生囉！再教唱？唔會啦！要同我學？睇多啲《巨聲》啦！每次我嘅評語咪就係我唱歌心得囉！」

對巨聲幫評語一針見血，陳潔靈話係自己多年唱歌心得，想佢哋好先咁講！

眾多學生中， Miss Chan Chan最讚不絕口都係天后容祖兒：「呢個世界冇天分 o架！最緊要都係夠勤力，所以抵 Joey有家成就！」

除咗 Kelly、 Twins，另一位實力派關心妍都跟過 Miss Chan Chan學唱歌。

全行至貴杜麗莎

收費：一小時$1,000-$1,500、另加心理輔導及顧問費$500
賣點：報名奉送獨門一小時開聲 CD

圈中另一個桃李滿門名師就係巨肺始祖、有 40幾年唱歌經驗的杜麗莎， 92年移民美國時已在當地教唱歌， 06年在港開設「杜麗莎國際演藝學院」，門徒包括鄭秀文、鄭融、薛凱琪、關心妍、王祖藍，同走音後閉門惡補修練嘅傅穎都有到賀！

佢提升埋我 EQ添！(真實對白)
薛凱琪一出道就入杜門學唱， 04年出道時被公認為最唱得新人：「家學咗咁多年，我都冇停。因為除咗唱歌，老師最寶貴係分享畀我佢咁多年以嚟嘅舞台經驗，提升埋我 EQ同心理質素最緊要！」《忽然 1周》圖片

師傅好寶貴！(真實對白)
由出道就開始跟杜麗莎學唱歌嘅鄭融話，師傅再貴都抵：「每次錄音同做騷前我都會好勤力搵老師，因為論經驗，師傅真係好寶貴。一首歌，經過佢提點感情、演繹應該點至到位，效果比自己領悟好好多！」

Sammi 04年個唱特別翻唱〈假如〉，感激老師杜麗莎。

城城恩師麥潔文

收費：一小時$500
賣點：天王城城恩師，同場加映江華演技進修班

最近加入《超聲》做評判嘅麥潔文，係八十年代紅遍樂壇嘅〈勁舞 Dancing Queen〉，近年除相夫教子，最大事業都係教唱歌，得意門生除視帝老公江華，仲有天王城城！

教 過郭富城、黃伊汶同朱茵嘅麥潔文，最讚不絕口都係天王城城：「郭富城由〈愛的呼喚〉開始跟我學唱歌，愈紅愈忙嘅學生，愈對自己要求高！佢冇辦法定時上堂， 每次都係開演唱會或者錄碟時，約佢嚟錄音室上堂。城城以前唱歌，鍾意尾音拉得好長，仲話呢個至係佢特點！我唔怕直話直說：『你所謂特點，反而暴露自己音準 同唱功缺點，要改啦！』以前邊有人夠膽咁話佢呢！」
夠膽彈天王， Kitman亦狠批天后，因走音被抨擊嘅謝安琪， Kitman亦有留意：「生完 BB元氣的確大傷，我都試過一排丹田聚唔到氣，唱歌失準。謝安琪把聲其實好靚，但唱歌水準唔穩定，冇得賴落生仔度，明顯係基本功唔夠，要再勤力啲至得！」

Kitman現在雖然冇教明星，但佢學生由 8歲到 80歲，而 80歲學生仲係有老人癡呆要坐輪椅上堂，佢話唱歌可以減輕病情。

80年代係 Kitman在樂壇最光輝日子，首本名曲〈勁舞 Dancing Queen〉同一字眉造型都係經典。

全靠 Kitman調校，城城成功搣甩初出道時雞仔聲。

去年 12月， Kitman為得意門生舉行師生個唱，影海報請 dancer，仲有老公江華做嘉賓。

一門三傑舒漫媽

收費：一小時$500
賣點：雲南歌舞團正規聲樂老師

睇 《超級巨聲》，唔只發現官恩娜係唱得之人，好多網民亦勁讚原來鍾舒漫唔只跳得仲唱得。唔講唔知，鍾舒漫師承自己媽媽：「我媽咪喺雲南歌舞團教聲樂出身，我 同妹妹都跟佢學。妹妹鍾舒淇去台灣參加《超級偶像》前，都有喺香港教小朋友同圈中人唱歌 o架！自己媽咪教唱歌，最大好處係熟悉我同對我更嚴厲，同埋唔懶得，會成日俾佢捉我返去上堂 o架！」

鍾母教唱歌好嚴厲，鍾舒漫說：「佢曾經為咗教我用喉嚨唱歌，肉緊到用自己拳頭塞入我個口。」

鍾舒漫妹妹 Suki年初參加台灣《超級偶像》，仲成功打入七強！

o靚模跟學
除咗鍾氏姐妹， o靚模 A.Lin同 DaDa都係鍾媽媽門徒。

3級制

要跟天王天后跟星級歌唱老師學，唔係畀得起學費就得，叫得做星級名師，期表排得密過班紅星學生。其實要跟圈中人學唱歌，仲有其他選擇，每堂收費其實唔係個個咁揦脷嘅。

採訪、撰文：娛樂組
攝影：娛樂攝影組