十首你解錯又或者係你唔知佢講乜的歌。歌詞或任何藝術都有無限的解讀可能的，亦沒有一個正確答案，正正係藝術的意義及可愛之處。但係一個作品總有其原意或者係一D暗示，係需要讀得仔細，用不同線索來解讀來make sense的——你又解得通幾多首以下的十首作品？幾多首你係知道其實作品係可以咁解的？
林夕講過佢放過好多暗號在佢的歌，要明的人先讀得明；黃偉文都曾經講過佢D 歌充滿密碼，其中容祖兒《黃色大門》與何韻詩的《紅屋頂》正是只有樂迷才明白的定情信物。作為愛歌詞的香港樂迷，我們是時候要識得讀歌詞，懂得用不同角度不同線索讀好歌詞，至少不要用《最佳損友》來歌頌友誼了。
楊千嬅 / 林夕 《小城大事》
好多人以為《小城大事》只係首失戀歌，係，但係係接近厲鬼式的失戀歌，因為係講女主角失戀而自殺的歌。「小城大事」就已經暗示呢件事係大事，可以係「報紙的頭條」，「而這吻別似覆水 再來也許要天上團聚」，「我下來 你出去」都係聨想到其實女主角「跳樓」的場面，而最後「每年這天記得再流淚」其實唔就係「死忌」般的大事？唔係點解每年都要記住？
陳奕迅 / 林夕 《富士山下》
《富士山下》同《小城大事》一樣係林夕的精彩大路作品。相信唔少人其實都知道《富士山下》其實係講男方同苦戀自己o既對方講人生哲理的一首作品，但事實上《富士山下》係一首充滿畫面的敘事作品，敘的其實係兩個主角在情人節雨中重遇。林夕將整件事寫得又浪漫又詩意，將那種人生哲理說得何其動聽，充滿佛性，但其實如果將《富士山下》變成口語或現實情節的話，主角就可能被理解為一個涼薄的賤男，絕不如詞中那麼感性、好心地。即係類似咁︰
喂，落緊雨喎，你仲喊緊，咁我都唔係咁衰我都仲關心你O既，今日唔車你返屋企都唔得啦。我都想你好o既，所以我唔再送花囉，我都唔鍾意你，唔通送到舖滿墳場先叫好咩。你都係死左心去啦，要嫁畀我？等到大家死果日都冇可能發生喎大佬，唔通咁你先滿意？
其實人一世好多野都唔係想有就有架啦，你抱住個男人都唔代表佢個心屬於你架，擁有過就一定會有失去o既一日啦。我地都叫做響日本度雪中浪步過哇，咁浪漫，點解你要講到好似慘o者？好回憶來架喎，又有邊個人可以用愛來擁有富士山咁巴閉？點解你唔諗下其實人的感情只係你自己虛構出來，本來無一物又何處惹塵埃呢？其實呢d 過氣感情就當係石頭響街度隨便掉左去就算啦，你仲諗咁多仲乜o者傻女，我只係森林裏面的一棵樹，你行下街開心下你就會唔記得我架啦。
今日係情人節我都唔敢講咁多，你喊到咁我摸下你髮尾安慰你又驚你觸景傷情，好難做喎。而家我地焗住響車上面我真係唔知點算，仲睇到你學人玩????手咁盡，點解咁傻呀你。人一世好短架咋，你失戀唔開心梗係想死啦，難為我而家咁尷尬要車你返屋企，呢個回家路好似無盡頭咁。都過左咁多年，櫻花都開過幾十轉啦，我地的感情係歴史喇。
講咁多你仲唔醒呀？我送埋我呢件陳年舊褸畀你，你自己鍾意儲起佢又好燒左佢又好啦。
P.S.我仲好關心你架，但唔會鍾意你架啦，死左條心啦，到死果日我都唔會鍾意你。
黃耀明 / 林夕 《下一站天國》
好多人聽黃耀明的歌都聽到一頭霧水，而多數d 人識的歌數來數去都係《春光乍洩》或者《下一站天國》，識唱的人或者唔少，但識解又唔知幾多個。前者講性就講得幾直接，後者講的其實如果淨係理解為與情人分開的歌曲的話，其實就好似係一首黃耀明版本的《再見二丁目》，無論用字及意境其實都很相近。
但係呢，除左係普通分手歌外，呢首歌其實係講係同「陌生人」hook up的可歌可泣的「一日情」故事。歌曲一開波就最淸楚，因為主角一開始就知道呢個關係只係維持一日，聽日就唔見架啦。然後「請緊緊擁抱證明你貪心 請輕輕一吻證明這個不是路人」就係激情時候啦。「路人」除左係比擬，仲可以係指真係路人咁簡單。
點解係「下一站天國」？意思係同呢個人的關係只會維持呢一日，下次再見再有機會「緊緊擁抱」就只能響天國囉。
由短暫的關係聯想到「天國」，再作結叫大家「請勿回望，請勿善望」呢類「短暫關係」，就係林夕點解咁犀利的原因。
謝安琪 / 黃偉文 《囍帖街》
從字面看來，囍帖街講既係一對情侶因為没有經過深切既考慮就決定結婚，結果喺搞婚禮既過程中發覓大家唔適合對方而結唔成婚。但呢首歌有另一個深層意義，就係以「囍帖街」呢條真有其事既特色街道寄喻大家要好好珍惜現在擁有既一切。（2008《Milk》）或者有保育人士見倒「有感情就會一生一世嗎？又再惋惜有用嗎？」呢句會覺得呢首歌係叫人放低對公共事務、環境保育既執著，但謝安琪就明言話「囍帖街冇寫出黎既，反而係傷感同憤怒」，咁睇落，歌詞想表達既反而係大眾對清拆既無力感同深深不忿。但用如此惹人誤會，叫人放開放低既措詞展示自己既不滿，確實係表達不彰。
謝安琪 / 周博賢 《私隱線》
【Binary 】一碟裏面是又幽默又市井的，除了有《入型入格》外，其實《私隱線》的「諧音」亦是抵死幽默。簡單來講，成首歌其實即係︰
哇，地鐵D 人講電話講得好X大聲呀喂，我冇X興趣知道你講乜喎，癡撚線咩。
林海峰 / 林海峰 《我撐你》
林海峰是香港樂壇詞界裏頭被underrated的填詞人，零三年【我撐你】同名主打就係林的其中一個創意高峰。好多人以為只係真係講「我撐你」，睇真D，「撐」其實係歌頌緊男人性器喎。「我一朝早撐起 奇 太神奇 通通都話跌 偏偏他就彈起」仲唔係講緊晨勃Morning Glory？呢首歌玩「撐」的聯想玩得出神入化，「撐」出好多個意思及解讀，原來撐你等如「我⋯你」。
軟硬天師 / 林海峰 《點解要大家笠》
原本的軟硬的歌詞通常都幽默抵死，而抵死在有不少人其實唔係太明有麻甩的軟硬唱的係乜野。《點解要大家笠》好多人淨係聽副歌以為「笠」只是Love，但其實成首歌就係講係要笠個安全套，又係玩pun 語帶雙關。
楊千嬅 / 周耀輝 《良性反應》
楊千嬅今年的《色惑》的災難指數實在爆燈，不僅楊千嬅老了，連周耀輝的筆亦老了。周耀輝為當年正人氣急升的楊千嬅填的《良性反應》就係比《色惑》咸好多趣好多的作品，但同時亦做到樂而不淫。歌名其實係「優良 性 反應」，歌曲基本上係講緊「熱戀的年輕情侶上床就要戴安全套」，歌曲一開波就係「我地咁後生梗係唔想有BB /STD要帶condom啦」，而當中更有「陪我每天 娛樂我萬次」等句，比《色惑》來得性解放、玩味一百萬倍吧？
盧巧音 / 周耀輝 《佛洛依德愛上林夕》
盧巧音的《佛洛依德愛上林夕》令不少人頭痛，但其實周耀輝的歌詞很簡單，「林夕」非林夕，林夕是「夢」；而佛洛依德Sigmund Freud以《夢的解釋》最廣為熟識。所以簡單來講，非副歌的部份全部都是夢的片段，而副歌簡單來講就係叫你「你聽我講我的夢就得架啦，唔駛解唔駛分析呀」
如果想像是一個港女，同男朋友講「我個夢呀見到點點點點呀」，男朋友一副認真樣答「喂，可能潛意識你係⋯⋯」，女朋友嗲聲即時叫「耶，你唔好咁煩啦，我話畀你聽我個夢你就聽啦，我唔明果D 咩psychoanalysis 咁深o既野架～～～～」
麥浚龍 / 林夕《弱水三千》
根據朱耀偉教授既解讀, 《弱水三千》出自《紅樓夢》第九十一回, 賈寶玉講既一句: 「任憑弱水三千, 我只取一瓢飲」， 意思係弱水三千里長, 但只取其中一瓢黎飲, 可以比喻為芸芸眾生, 只愛一人。但呢首歌講既不但只係愛情, 仲有佛理同道家思想。林夕經常勸人讀《道德經》, 而且喺訪問講過要用不同既形態黎抵擋不同既野, 呢啲叫上善若水 (《道德經》第八章). 所以林夕以水貫穿成首歌, 用水既唔同形態黎講人生哲理. 同樣出自林夕既《浮生若水》 其實就係《弱水三千》既大眾版, 直頭有[善莫善於水]呢句, 但前者說教味濃, 淺白易解, 後者意象深, 晦澀難明, 將流行歌推至要用哲學典故解讀既層次.
好正! 希望有更加多既解讀分享!
好詳細!正
不過我自己就覺得囍帖街我GET 到既都係不忿而非作者所寫既放手…
歌詞有多種含意正是引人入勝之處
Thank you for the clarification! 另外，可唔可以解釋埋勁人林海峰隻《經典》？佢好鬼衰，寫到咁，等啲人以為呢隻真係一隻祝福新人嘅歌，搞到就嚟趴咗麥嘜隻豬腩肉頭，變咗近年敬酒指定歌曲咁濟。實情係句句喺度諷刺啲人結婚搞大龍鳳同過程中嘅虛偽。我每次聽到人播都唔知點反應好！你快啲幫手澄清吓，同俾人知林海峰真係好勁。