傻的嗎？農夫【雙囍臨門】點解主打唔係《Hi Auntie》？

雙囍臨門

農夫

廠牌：星煥國際| 評分：6.9

你的評分

[starrater tpl=10]

由地下走到地面更成為其中一隊最受歡迎組合，由憤怒到變寫盡香港打工小市民心態的新一代「林海峰」，或者農夫在主流環境下越來越流露「主流價值」、「正氣」，都也不過是正常事。

我們當然仍然記得【風生水起】及【音樂大亨】兩張令農夫從小眾贏得大眾一笑的兩張又幽默又好聽的專輯，往後的呢？我們不幸地從農夫身上再一次見証「人氣」與「創作力」往往是有反比的。分柝又好，合體又好，就是不夠啜核，不夠創新，太過主流。

我(們)不是不喜歡徐浩、randy chow帶來的火花，那種帶點八九十年代日式流行曲的編曲美學，都是好easy listening。不是不接受正能量的《重新找到你》或《全民合拍》講香港人的打不死精神的yeah yeah yeah快樂調調，更鍾意「認你又唔做下一個李嘉誠」當中的幽默。更加欣賞簡單的《複製人》用電子碎片做loop，鬧香港人冇獨立思考能力同金錢敗壞風氣，「細路仔老師都係同一身分成為制度下的洐生品」依然鬧得好好。

玩老土日系流行曲編曲元素的《雙喜臨門》講結婚當晚即刻一擊即中大肚的故事係啜核好笑。《同伴》亦十分catchy亦有意思，借用張國榮的經典《Stand Up》就夠特別，不同context 下張國榮的跳舞經典也突然變得充滿政治意味。同時，《狼狗羊》扮唔同唱腔，一樣好笑。係，成張碟係依然間接寫出香港狀況，依然笑中有淚，但係，講到尾，無論在音樂元素到幽默水準，農夫就是少了走紅時的那個edge，維持水準，依然ok好笑，但以坊間口吻來說，就係冇爆點。

不過，我未講《Hi Auntie》。

農夫用高登術語寫的《Hi Auntie》是一首簡單catchy的跳舞作品，除了夠groovy夠好跳外，最重要係歌詞簡單爆笑，「針對並唔係你媽媽/ 不過係形象化了她」就終於將農夫的搞笑本領推到高峰。我亦可以聯想現場呢首歌會真係被改成以「X你老母」來唱，令全場high爆。

就係囉，一向自認高登巴打o既農夫就係應該直接了當，唱出香港人情緒，有嗰句講嗰句。正能量已經夠多，已經有太多操守，留返畀其他一大班主流歌手做啦。農夫雖然你呢張碟已經多左較露骨o既語言，但你派台歌變得咁文質斌斌，又感性又正氣，真係唔知你究竟想sell咩。你派《Hi Auntie》就算真係hit唔起，至少會變成一首cult hit哇，亦吸納更多你的聽眾群哇。你唔係真係想響林峰FANS層面搵聽眾哇？

感覺上農夫每張碟的製作費越來越低，我只係有D擔心農夫可以唱幾耐o者。當然，我明白農夫要顧佢地主流大眾的聽眾，所以派《同伴》等又正面又寫到香港情況o既歌都無可厚非。但係，香港已經有太多好似民主黨一樣的「穩中求變」、「注重體面」的主張，點解你係都唔可以再大膽d走多一步？

首選︰Hi Auntie

Leave a Reply