轉載自原諒自己 劉美君
Face Weekly
2009年08月19日
今年 45歲的劉美君， 8歲拍可口可樂電視廣告入行，至今 37個年頭，不算是長期活躍在娛樂圈的藝人，不過保證，每次出現，總有話題。
18 歲結婚生仔， 22歲平地一聲雷唱紅歡場主題曲〈午夜情〉， 40歲再婚生女， 43歲唔聲唔聲拍了套《我不賣身．我賣子宮》奪下金馬獎影后，今年再試新嘢，從來沒做過主持，卻擔起無綫重頭選秀比賽《超級巨聲》主持重任，果然「不負眾 望」，被觀眾群插伎倆單調、說話重複、口不擇言、 2千幾人登記加入 facebook「反劉美君繼續擔任《超級巨聲》主持」群組，風頭蓋過所有參賽者。
觀 眾和網民的力量，對「屎」上最強的傅穎和鄧麗欣，可能會是沉重打擊，對我行我素了 45年、騷到骨子裏唱「誰願意，身體每處任撫摸」的劉美君卻不是一回事：「網民意見，我有睇，勁插囉！我有番咁上下大個，喺呢行有番咁上下時間，人哋講咩 都好，我有個好處，係識得原諒自己！」
很高興聽到劉美君說自己懂得原諒自己，怎樣說，主持功能也不是劉美君杯茶，還是唱歌算罷，新碟十月出，新歌〈我喝香水大〉，一睇歌名已係佢條路，點都好過陰功傻豬個台交畀你……
你估不到
20 年沒拍過電影，去年忽然走出來拍《我不賣身．我賣子宮》，拿下第 45屆金馬影后，劉美君說，自己勝出的原因是人生閱歷豐富。不過，做主持，大家應該都同意，只有主持經驗豐富的人才能勝任，絕對不是入行 37年從沒做過主持，又定居美國 10多年，承認自己最不靈光就是中文的劉美君。
「個個以為我一開始接呢個 job係做評判，個個都估唔到，我今次一返嚟，會接個主持嚟做。 TVB搵我，我都問點解，佢哋話係想搵個有咁上下資歷同音樂背景嘅人。我起碼係唱歌出身，除咗評判，我都可以講到啲嘢出嚟。因為佢哋相信我份人，冇嘢怕，夠膽講。」
的確夠膽講！劉美君在節目中夠膽寸側田，亦挑戰電視尺度「小」參賽者：「我一定大過你，我小邊個都得！」更夠膽死集集三幅被口頭禪「陰功囉，傻豬，唔好喊！」以及「交個台畀你！」本來人人期待敢言的劉美君插人，結果是，被插得最甘的，反倒是劉美君本人。
「剪 接出嚟嘅效果可能完全唔同，睇現場嘅朋友唔係咁同我講喎。網民意見， fans send晒畀我睇，我又冇乜所謂，好與壞都會睇。有道理嘅，我會接受、會改進，但有啲人唔知頭唔知路，我做咩要去介意？我成日同啲小朋友（參賽者）講，參 加比賽，唔好期望過高。好似我咁，永遠享受嘅係呢一分鐘。我返嚟做主持，唔通係想做咩金牌主持、改路線咩？等於我返嚟拍戲，如果一心係要想攞個金馬影后， 你估我就攞到啦咩？」
劉美君主持《超級巨聲》至今，輿論一致有彈冇讚，無綫終向現實低頭，最近決定加入森美、李克勤等嘉賓主持救亡。
以唱歡場情慾歌起家的劉美君，去年首登紅館舞台開個唱，話到明《大開色界》，晚晚請男嘉賓上台大膽魚肉。圖中被劉美君疑似抽水的，是影帝梁家輝。
我好 out o架！周秀娜，我永遠都記錯係周秀蘭；傅穎係邊個？好靚 o架？大眼 con？有啲咁嘅嘢咩？〈花吃了這女孩〉？你哋都話唔好聽，我聽嚟做咩呢？
揀做唱歌比賽回流香港，劉美君說，除了久唔久想試吓新嘢外，最大的原因是，歌唱比賽的主角是參賽者，不是主持，歌唱比賽亦有自身的既定模式，主持不需要話多，更不需要溫故知新久違了的娛樂版。
「我好 out o架！周秀娜，我永遠都記錯係周秀蘭；傅穎係邊個？好靚 o架？大眼 con？有啲咁嘅嘢咩？〈花吃了這女孩〉？你哋都話唔好聽，我聽嚟做咩呢？
我大仔今年 25歲，鍾意 Jessica Simpson，係行性感，但唱都唔難聽。我好放心個仔，有 music sense，唔會鍾意啲唔識唱歌，得個樣嘅人。」
童星出身的劉美君，從小電視劇、廣告、教學影帶拍個不停， 17歲高中畢業卻突然退居幕後，擔任電影公司製片和唱片代唱及和音，正是因為不想靠樣搵食。
「細細個就俾人讚：『眼大大好得意呀！』我唔鍾意人讚，靠樣咪即係話自己蠢？我係要證明我有另外一面，所以轉咗做幕後！」
做 做吓幕後， 86年臨時拉伕主唱電影《午夜儷人》主題曲〈午夜情〉，電影唔收得，反倒是主題曲被唱到街知巷聞。趁勢推出處女大碟《劉美君》，首本名曲不是唱歡場就是唱 一夜情、第三者， 22歲的一子之母唱情慾歌唱到出位，不止在 20年前，今時今日，劉美君三個字，也是前衛與大膽的代名詞。
「以前，我唱舞小 姐、唱第三者，我又唔係做歡場，我係幫人唱。由細到大，人人話我有 sex appeal，話我把聲騷，我真係唔覺。 10月會出嘅新碟，我都問林夕，點解我冇刻意前衛、冇研究過個 appeal係點，人人都咁睇我？林夕話我天生，人哋學都學唔嚟，所以寫首歌畀我叫〈我喝香水大〉，今次隻碟，我就真係唱自己喇！」
為好玩，劉美君去年蓬頭素顏戴煙屎牙牙套接下電影《我不賣身．我賣子宮》，無心插柳打敗大熱林嘉欣，登上第 45屆金「馬獎影后」寶座。
22歲被臨時急召主唱電影《午夜儷人》主題曲〈午夜情〉，又是無心插柳，處女碟《劉美君》狂賣 40萬張，成為經典。
史上最強
新碟的另外一首歌《雪泥》，劉美君說，唱的才是真正是自己的情路。
「雪 pure，而泥好污濁。我年紀有番咁上下大，跌得多，自然成身都係泥。我喺好多人眼中，又 strong又 tough，冇有怕……唔通我喊嘅時候、怕嘅時候，喺大家面前做咩？」
18歲嫁電影導演黃泰來，並產下一子，劉美君的第一段婚姻 92年結束。 02年，再與甄姓男子結婚，並於 40歲高齡產下次女，去年回港時，宣布再度離婚。劉美君的邏輯很有趣，她承認人生中跌得最傷的兩次，就是兩段婚姻，不過跌得再傷，亦不能被形容為失敗。
「我覺得我係一個活得非常之精采嘅人，因為我從來唔會因為害怕而卻步。失敗係一般人嘅形容詞，我唔會用失敗嚟形容我兩段婚姻。舊年又離婚，家無感情生活可言，不過我好鍾意現在嘅自己，人愈大愈清楚自己想要啲咩，愈過得開心。」
傳 媒和網友的話，劉美君從來不上心，上心的只有在 25歲的大仔和今年 5歲的細女，真正做個女強人：「我覺得我份人真係冇咩缺點，我啲仔女學到我最好。今年母親節，我對仔女都係咁同我講，覺得媽咪係個好 strong嘅女人，希望我繼續係咁。我覺得好 sweet、好自豪。細個，我真係所有嘢都收埋，家呢個 stage，我要話畀人聽，真正嘅強者才會承認自己嘅失敗。以前，我係裝強，家嘅劉美君，先係真正強。」
我覺得我份人真係冇咩缺點，我啲仔女學到我最好。
02年再婚， 05年 40歲時才誕下次女，劉美君說，女兒長大要是能學到自己為人處事五成，就心滿意足。
與首任丈夫黃泰來再見亦是朋友，去年復出樂壇拍 MV，亦是對方幫手。當年還會陪媽媽周圍出席活動的長子，今年眨眼 25歲，在美國從事金融工作。
上週二錄影的最新一集《超級巨聲》，森美正式應召救亡，搞 gag無數，被傳媒表揚搶晒劉美君鏡，成功讓本如一池死水的錄影現場重現笑聲。
訪問卻在 7月尾進行，劉美君來到本刊影樓的時候， order飲品時說要來一杯「中文茶」，惹來哄堂大笑。
自稱鬼婆，說話出口前先在腦中英譯中的劉美君，原來是直譯「 chinese tea」出事。劉美君其實都識搞 gag。
鬼婆講中文，是笑位還是出事，唉，兩睇啦。
撰文：朱小博