《蘋果日報》報導，財爺曾俊華參觀台灣誠品書店，卻不幸中伏。誠品太子女吳旻潔「不幸」在過萬張CD中挑了張My Little Airport 的【介乎法國與旺角的詩意】給財爺試聽，是機緣巧合，還是精心挑選呢？
到底財爺聽到了甚麼句子呢？是「窮人賣屎忽救香港」，「林瑞麟本身都應被瓜分」, 還是「Donald Tsang, please die, 我地實上街」？無論聽到甚麼，經此一事，創作人林阿P可能應驗了：「或者我已經不能返大陸探親」。
——————————–——————————–
蘋果日報 2010.08.30
隔牆有耳：誠品明玩鬍鬚曾
菲律賓慘案後，煲呔、唐唐等高官即時煞停外訪，但鬍鬚曾就繼續台灣之行，噚日朝去咗港人遊台必到嘅誠品書店，行咗近兩個鐘，去到 CD部時，誠品太子女吳旻潔（ Mercy）唔知點解咁鬼醒，喺現場逾萬計嘅 CD中，揀咗香港組合 my little airport隻碟出嚟播畀鬍鬚曾聽，當中曲目寸爆特區政府，包括以鬍鬚曾老細為題嘅《 Donald Tsang, please die》，搞到鬍鬚曾聽咗 15秒就掟低個聽筒走人。
呢隻 CD鬍鬚曾聽咗 15秒就掟低個聽筒。
話說噚日太子女陪鬍鬚曾行到 CD部試聽機前，想示範點樣可以唔使拆開隻 CD，都可以試聽到張碟嘅音樂，隨手拎起隻未拆開嘅 CD，想話播畀鬍鬚曾聽。原來隻碟係香港獨立樂隊 my little airport舊年出嘅《介乎法國與旺角的詩意》，碟中名曲包括寸爆林公公嘅《瓜分林瑞麟三十萬薪金》，同埋因為煲呔喺六四 20周年前發表見利忘義論、激發樂隊成員阿 P創作嘅《 Donald Tsang, please die》。
只見鬍鬚曾睇到碟背嘅歌名，即時面色一沉。但洋名 Mercy嘅太子女認真 No mercy，一邊播碟一邊問死頂聽歌嘅鬍鬚曾：「你有聽得見嗎？」鬍鬚曾就話：「這支是最後。」又話「這一首是廣東話」，跟住聽唔夠 15秒就掟低聽筒走人。
碟背資料顯示，最尾一首歌，正係叫煲呔去死嘅《 Donald Tsang, please die》。似乎毫不知情嘅太子女此時仲表現興奮，話「隨手拿一個，就拿到是廣東話的」，鬍鬚曾就答話自己都係鍾意聽 Jazz多啲。
呢單嘢真係好有意思，鬍鬚曾去誠品話歡迎呢啲香港冇乜嘅創意產業嚟香港發展，但正正因為香港經濟被地產壟斷，啲租金貴到嚇死人，誠品先搞咗 10幾年都未喺香港落戶。阿 P就同八方講，希望鬍鬚曾聽晒佢哋啲歌，除咗都了解吓香港嘅創意產業，亦都希望佢明白，香港繼續有功能組別，繼續有官商勾結，根本冇得搞。
鬍鬚曾之後又去咗故宮博物館，政府新聞署諗住可以幫佢影相留念，點知博物館堅持執正嚟做，連司長到訪都冇面畀，唔准影相。
李八方