農夫【奇蹟】是怎樣煉成的


農夫

奇蹟
廠牌:CMD | 評分:8.5分 | 你的評分

Rap可以興幾耐,點樣同流行曲比賽?回眸農夫十數載,新意依然陸續來。但乜嘢題材都試過,似乎好難再有新突破。仲要繼續 Rap歌?長遠睇真係無好結果?果然【奇蹟】有奇蹟,Rap到招招積積,歌詞尖銳出色,落點夠晒刺激。幽默有,感動有,叫人反省都有,內容比【O’FAMA】充實豐厚,製作比【富甲天下】用心優秀。【奇蹟】分東西,各自各生輝,各有各路軌,夥拍新創作單位,用上正宗本土米,新思源拓新邊際。既然農夫【奇蹟】分開兩個監製,我哋都要有計仔,就由 MC Chikin 同 MC 百合斬件睇睇。

MC Chikin:
先講陸永果半邊,貫徹幽默深層次。歌曲風格靈活多變,總算係個人新嘗試。作品表面好和善,內裡揭示陰暗面。好似《我要打多支》,輕輕鬆鬆用結他一支,掃走皺紋肌膚緊緻,諷刺當下反智,打Botox打到本末倒置。人一大就習慣晒呢個世界,但係兒童眼中就係變態,《問題兒童》巧用純真兒童聲,反襯炎涼世態有幾古怪。幾年黎農夫作品最大嘅變化,就係音樂性一路地強化,《問題兒童》、《我要打多支》中陸永放輕Rap詞部份嘅轟炸,反而對音樂起伏敏感地變革,Rap唱兼稱自然通殺。

中韓混生,創意盤根,惡搞過高登。《韓國勁舞權》電音勁CHOK勁造作,笑到我哋無晒知覺。歌詞似有又若無,一矢串盡韓國風,實質「肥婆學跳舞」,硬塞歌詞扮風騷,總好笑過林敏聰,Balabala發嗡風。《寂寞是最無敵》,一樣無厘頭到極。揉合《八無禁忌》嘅武功,HipHop融合中國風,中樂電音混西東,京腔切入不鑑粗。無論勁舞定勁武,幽默依然可搵到,白欖並唔係齋數,農夫搞笑都要夠食腦。

《光行紀》同《愛不愛我》火氣足,營造陰暗令人感局促,歌詞淋淋有血肉。外星人睇住地球腐化嘅《光行紀》,嶄新角度諷刺社會病態夠銳利。《愛 不愛我》表面講愛情嘅可悲,其實瓣開一層可理解做毒品損人害己,相同Gimmick 早於《不不不》萌起,毒品戀愛原來係咁可悲。但對比起嬉笑連連,怒罵相對缺乏亮點。剖析農夫成功大多寄托於輕鬆一邊,無謂搶走Indie Rappers 偏向 Death Rap嘅發展,既要流行普及功能自然有異,以一笑道盡病惡凶險,似乎更合乎大眾心意。

我歌又聽到,碟又評到,要Rap都完全冇難度。陸永呢半邊質素咁高,請問MC百合C君果面又有幾好?

陸永部份首選:《問題兒童》

MC 百合:
咪好在呢Part C君Rap詞更入肉,滄桑一點而不落俗,即使曲風方面較大路,但誠意搭救不能叫你唔服。

揭幕布,率先有,自省開航《偉大航道》,過來人之身份數,回望以往人生路。或許路縱難行但有安排,你比想像更偉大,鼓勵勸勉或告誡,莫讓青春頹得快。繼續《阿遲》的醒覺,長氣密密說拍拖,談談幾年嘅感覺,一氣呵成唔囉唆,編曲捨繁以取簡,旋律易記亦好喃,如沐春風嘅清新,主旨突出唔零散。

又合唱,唱情歌,修為幾生長途共諧甜言暖心窩,但講到HipHop混進R&B,點解同 M-Flo《Come Again》咁類似,再聽副歌嗰個Beat,十足《蓋世英雄》嘅某一節,模仿咁足真係唔留面,你話係咪想要致敬先?

《吹摯友》吹下水中搞下笑,大同創作原來重複嗰十幾秒,C君好嘢適時轉腔換下調,聊聊家常再附著拍子抒發大聲叫。熱身一陣轉入正題想買樓,正是考驗你我情誼嘅時候,劃清界線打出你我不熟為由,今天看清你真的不是夠朋友。循序漸進內容連環互相扣,「不熟」重複催化作用唔覺漏,插科打諢間中針砭貴價樓,嬉笑怒駡現實係咁鬼難忍受。

要搵對應呢處有首《Good People》,DownBeat落下續著《勁舞》熱度,天真口吻明嘲人心叵測,反襯手法又似《問題兒童》。一暗之後歌唱《英雄》讚頌,Edward加入譜下柔情Good Soul,因為有你令我撥開迷霧,因為有你令我企喺呢度。珍惜現狀縱然《Rap Along Song》,Band仔出身熱血始終不忘,真誠地唱哪管能否起浪,笑中有淚知音伴我再航。

C君部份首選:《吹摯友》、《Rap Along Song》

各自揚帆,今朝更放燦爛,陸永C君恰如相分兩花,同氣連枝,作品得以誠意、創意灌灑。翻開農夫新一頁,其實【奇跡】内裏無乜大變,集合過往大成嘅奉獻,精彩之處更體現。

無言感激太多 喺心我哋將佢變做歌
無錯知音變多咗 但我哋仍然係我
當初押韻為過癮點會諗會影響人
呢生人有知音人做到今日咁我哋已經無憾

農夫繼續Rap到。

原文連結 (Chikin for 6wing部份) | 原文連結 (田中小百合 for C君部份)