在唱片公司官方網站已給除名的裕美，今期雜誌《Face》報導傳聞唱片公司Snazz與其解約，以下為裕美的哭訴摘錄：
停工近半年的裕美，上週孤清出街食飯買特價品，事後她在電話中對記者訴晒苦：「叻哥話：『人哋唔認同你唱兒歌，咪唱到人哋認同囉。』又話：『做呢行 70%靠運氣。』即係叫我等運到啫，我接受唔到！」據知阿叻趁裕美去年尾聲帶起繭要做手術，索性將她雪藏，最近更打算提前解約。
裕美更狂鬧阿叻唔公平：「 JJ鍾意唱歌拍戲，就畀佢唱歌拍戲；狄易達鍾意跳舞，就畀佢走跳舞路線。我呢，我十一歲開始學跳 hip hop到依家，冇人知，想公司畀我騷畀人睇，但公司只肯做穩陣嘢，唔畀我做其他專長嘅嘢。阿叻錫晒 JJ、達仔，好唔公平！」
上週她向本刊埋怨公司錫晒 JJ，更話：「 JJ識唱歌、我唔識咩？」
至於其經理人文滌就話：「的確近呢半年係冇工作安排畀裕美，之後仲未有計劃。（係咪打算同佢解約？）所有關於合約嘅嘢都唔可以透露！（裕美係咪同阿叻嘈過，投訴偏心 JJ？）裕美喺出面點講我唔理，公司都係冇回應。」
