轉載自︰Face 2009年09月16日
七年風流 Swing
由 Eric Kwok與 Jerald組成的 Swing，叫過做 Snowman，是比 Shine、艾粒更早的 boy band。 7年前因 Jerald一句而分手，今日復合又係因為佢。一個以《武當》新大碟之名復合，兩個大監製組隊，本地可一不可再。
02年時， Jerald自覺一身好武功，奈何 Swing闖蕩樂壇以來，一直叫好不叫座，決定歸隱，與英皇提前解約， Swing暫別，是上一回的故事。
到 今年頭， Eric Kwok走出閉關日打夜打的《魔獸世界》，推出個人大碟《 LEET COLLECTION》，相比起去年寫給謝安琪 hit爆的〈囍帖街〉，成績始終比下去，猶記得當時訪問， Eric說：「 Jerald唔似我咁 pop，又怕咗做幕前，會介意成績未能如意， Swing未必可以重來。」
但今天……究竟是甚麼回事？ Jerald：「是我打給 Eric的，記得已經係夜晚兩點。合約上面寫解約後 7年唔可以同其他公司做幕前工作，屈指一計，啱啱夠，不如再玩。」
分手係佢，復合又係佢，只因今次 Jerald做好「大不了一走了之」的準備，「出番嚟最大分別係冇期望，好嘅話會搵多啲儲老婆本，唔好嘅話兩年後去加拿大結婚生活。」
分 手期間， Eric幫 Eason、 Kay、祖兒， Jerald又幫 Juno、劉美君做監製，曾經又一齊做 Eason《 Life Continues》 EP， Eric：「以前 Swing一人作一啲歌，有時淨係 hit我嘅〈 1984〉，有時 hit佢嘅〈半張飛〉，會令對方唔舒服。我哋今次做 message tee，要兩個一齊睇先知咩意思，其中一件係我印〈 1984〉，佢印『 I hate this song』。」 Jerald：「事實上真係唱得太多次啦。」
Swing profile
陳哲廬（ Jerald）
出生日期： 1973年 1月 9日（ 36歲）
背景：父親是香港著名作曲家陳永良，後隨父親移民加拿大，回港後曾同父親一樣亦為劉美君作演唱會監製。
音樂偶像： Sting
最愛電影：《 Die Hard》、《 Back to Future》
新歌最愛：〈魚蝦蟹〉
「講個海愈嚟愈少魚，靈感來自睇完紀錄片《 The End of the Line》， 30年後大海可能再冇魚，因為俾我哋食晒。」
郭偉亮（ Eric）
出生日期： 1974年 2月 3日（ 35歲）
背景：香港出生，小時候父親是律師， 15歲到美國留學，修讀傳理系，回港後成華納作曲人。
音樂偶像： Quincy Jones
最愛電影：《月黑風高》、《 Groundhog Day》
新歌最愛：〈 Let it go〉
「第一首一齊再作嘅歌，因為鍾意個名，叫成日覺得懷才不遇、容易妒忌、執着嘅人放開啲。」
第 3成員陳子聰？
但 估唔到，原來 Swing前身 Snowman開始時本來有 3個人。 Eric：「我哋兩個相遇喺唱片公司，係一個前輩介紹我哋識，起初見佢好寸，但後來一傾音樂就不得了，始終大家都喺外國返來，當時公司仲想加多個澳洲返來的陳子聰，負責幕前，但後來佢話要留喺嗰邊唔知搞乜所以告吹。」
新大碟取名《武當》亦係似 ABC亂揀漢字， Eric：「我哋鍾意武字同當字走埋一齊，嗰種『勁』！我哋以前仲好鍾意睇黃日華做嘅《射鵰英雄傳》，所以今次 MV好榮幸搵到佢同劉丹客串番郭靖同北丐。」
Jerald就戴頭套做南帝，除咗真係吊威吔飛嚟飛去，〈 Let it Go〉一曲仲打到除頭套！ Jerald：「雖然嗰 MV同首歌冇關！哈哈！」
我有貨
猶 記得 Swing解散時最後一曲〈大大公司〉，講一間公司執笠仍然以禮待人，今次有新曲〈我有貨〉回應，講做股民心態，要信自己唔使一跌就沽。奇在 Eric唔多儲錢未買樓唔多投資，點會揀呢個 topic？原來係 Jerald，最後佢講到唔捨得走，推介隻 2823、 A50中國基金。難怪係佢可以話分手就分手。