好坦白講，近年好多香港流行曲聽了半分鐘就不再有聽下去的衝動，陳腔濫調，流水作業，又係果d。其實對商業流行曲冇乜要求，流暢輕輕快快radio friendly 開開心心好似歐美流行咁，只要不overplay，聽一兩次也沒有所謂，至少不是又慘過死人果d 情歌慢歌先啦。
估唔到連詩雅《等到Sunday就Call你》我竟然自願聽了三次。這種純屬講開心的廣東歌買少見少，這首有點像容祖兒《心花怒放》的version 2 ，更聽得幾開心下。不是說首歌有幾特別，坦白講，首歌好老土，曲風到編曲都好典型舒文式的野，well produced 但好工廠，但整體處理至少開心到位，funky guitar groove同那些和音都好八九年代亦好fitting，verse 到chorus的轉折位及尾音的soulful 處理令我諗起陳奕迅的《昨日》。至於有人話抄Apink《Nonono》，呢種旋律編曲唔好話抄邊個了，正如一部電視掉落街都唔知會壓死幾多同樣的人，正如《Nonono》原曲都聽唔出有什麼原創性在裡頭，我不排除呢首歌reference 佢來做啦，但黃思彥個編曲算係咁啦。
不過，最令我興奮的係最近開始新的市井寫法的周耀輝的歌詞，又西又搞笑又確實寫出這代年輕人的心態。大家要知，「星期幾」一向係歌詞最普遍題材，更係每個年代年輕pop songs 的必有題材。早幾年有Rebecca Black 的《Friday》成至尊西歌，今日則有連詩雅的《等到Sunday就Call你》有潛力成為廣東版本的星期日之歌。唔駛講乜，單係副歌已經知道今次周耀輝真係上力了
望著屏幕會飛
飛入美好的Sunday
若有短訊也就感覺著勝利
睡在床上會飛
飛入美好的Sunday
沒有短訊也越感覺要知
想要知即刻Call 你
在美麗世紀
我最驚委屈自己
「在美麗世紀 我最驚委屈自己」，係囉，廣東歌，唔該大家都放輕鬆下啦，有時扮下港女或細路女在亂世都當太平盛世抽離下都對身心幾緊要架。