其實報導一出，我朋友已經whatsapp我同我講︰「喂，呀Sa走音都可以上報紙？」一語中的。阿Sa走音，其實同太陽由東邊升起沒什麼分別，一樣平常不了。有一日佢唱到好似韓紅咁澎湃，其實係咪先要做新聞？不過咁，香港人就係咁悶，我反而驚訝樂迷仲真係睇【無綫紅白鬥】。呢d係咪自虐心態？又要X又要睇，成個節目製作幾認真有眼見，呀Sa走音，容祖兒唱到斷氣，謝安琪唱得唔穩都唔係重點，各位要做的係熄電視罷睇無綫，明唔明？
不過咁，既然段片過左幾日都仲咁hit，唯有再抽水。睇返段片，其實阿Sa就擺明hea唱，同時可能佢心裡面正諗「喂正呀喂，hea唱都d人都咁開心，肥仔仲係咁興奮」，只係點知唱出來其實唔只係走音，根本成首歌要搵有幾多粒音合音in tune的仲難。搞笑在好似兩個上左台唱後仲幫佢in tune 返d 喎。
睇完段片，要再睇報導，報導先係爆點︰
走音 Sa返回後台接受記者訪問，還雀躍透露近日忙於籌備新碟，她說：「我呢排都有練歌，一星期上五日堂。」記者問她覺得剛才上台的表現時，阿 Sa反問：「吓，今晚好差咩？工作人員話 OK。」記者坦白告訴她勁走音，她即用手機遮醜，更眼濕濕說：「可能各花入各眼，我真係有努力學唱歌。」(蘋果日報)
呢個世界當然各花入各眼，所以我地從來不恥笑Twins的Fans，亦不排除依然有人覺得阿Sa呢次唱得好好聽啦。不過呀Sa呀呀Sa，呢件事話你知你d同事真係全部公公來(包括你唱歌師父，不排除你每日練歌你都out of tune但佢都仍然話你excellent)，冇個好人，幾咁陰濕。呢個世界上肯講真話畀你聽先係你值得信o既朋友。我小弟就再響度話你知︰你成首歌真係得幾粒音合音，好似食滯左o既talking Tom講野咁，好難聽呀喂。
經理人霍汶希昨日在電話中解畫：「阿 Sa把聲係有啲唔穩，不過唱 live真係有好多外來因素，會影響水平。雖然走音唔可以畀太多藉口，阿 Sa唱歌天份又唔夠人哋高，但佢後天真係好努力，希望大家畀多啲鼓勵佢。」(蘋果日報)
Mani這個英皇良母當然錫住呀Sa啦，唱到此田地也不過係「有啲唔穩」，同時佢又叫「希望大家畀多啲鼓勵佢」，咁啦，社會需要正能量，鼓勵就畀唔到，我地畢竟又唔係佢呀媽又唔係佢邊個，點解要畀鼓勵佢？咁啦，我只能夠叫佢地唔好妄自菲薄，點解要話「阿 Sa唱歌天份又唔夠人哋高」呢？「唔夠人哋高」？唔夠邊個高？阿Sa響佢公司度唱歌都幾好聽呀。
仲有，佢講到「多外來因素，會影響水平」，喂，唔只你咁講架，人地都幫你咁講啦︰
其中阿Sa與台灣藝人炎亞綸出演「超班偶像Ｘ超班Fans」，被安排到戶外停車場演唱《下一站天后》，疑因場地空曠，音響與攝影棚有出入，加上阿Sa要分心與熱情粉絲握手，結果走音(聯合新聞網)
外來因素嘛，其實我反而係懷疑因為華南沿岸一帶個低氣槽影響到阿Sa佢用氣先啱！一定唔關阿Sa事！
當晚做評判的單立文坦言，「阿Sa喺停車場同觀眾握手，無綫嘅音響技術未必做得咁好，令表現有落差。」另一位評判陳奐仁則表示，現場聽阿Sa唱歌唔覺有問題，仲覺得好溫馨。(頭條新聞)
你問娛樂圈偽人朋友就同叫大陸政府查李旺陽一樣，多餘。正如呢，你點會聽到民建聯會鬧政府同大陸政府？
同門的泳兒也說：「正常人都有失準時，我也失準過，不可以抹殺她的努力，女歌手很多時候不只唱歌，還要顧高跟鞋，又怕走光！」(聯合新聞網)
最後泳兒先答得妙，「女歌手很多時候不只唱歌，還要顧高跟鞋，又怕走光！」我倒想知道女歌手好多時候唔只唱歌，咁除左佢講果d 外，仲要做咩呢？當然，握手就梗係其中一樣啦。
總之我就不怪阿sa走音，你同Twins認真不是更有趣嗎？不如欣賞下超假肥仔的浮誇演技仲好啦。
