我不賣風情，我賣老 劉美君 Prudence
忽然一週
2009年10月30日
撰文：陳盛怡
攝影：梁幹持
「儍豬，唔好喊啦，下次再嚟過！」今日不賣風情，已為人母的劉美君自認很 motherly，每次在《超級巨聲》中看見人喊，都會自動波「儍豬」安慰對方。
中坑 o靚妹電車男參賽者，個個「儍豬」上身，觀眾睇到毛管直豎，全城怒插。
「人哋喊，唔通叫人收聲，死埋一二邊咩！」
去年憑《我不賣身，我賣子宮》奪金馬影后的劉美君，自稱從不會喊，凡事靠自己。
「我成日同啲新人講，你要性格定要錢先？我就可以唔鍾意嘅嘢唔做！」
45歲劉美君經歷 N段愛情，兩段婚姻，有三個子女。
經驗豐富，看透人生，自然有資格恃老賣老，正如她在節目中說過：我小邊個都得。
非典型主持
近日大眾對利益議題敏感，記者先申報是《亞洲星光大道》 fans，無暇收看《超級巨聲》。節目如何劣評如潮，主持劉美君如何不濟，只知其一不知其二。倒是劉美君有一口烏氣要吐。
冇辦法啦，《超級巨聲》定位尷尬，本來跟參賽者有深入對話，但 so far（目前為止）講完都被剪晒。互動時間又唔夠，好多嘢都係 behind the scene（鏡頭以外）。
其實無綫搵我好多次，監製要求一個有相當資歷，個樣唔 outdate（脫節），有音樂知識又要 honest（誠實）嘅主持人。你話搵邊個？我就叫監製再諗下其他人選先再作決定。諗極，最終搵番我。人哋話我唔識做主持，咁電視台原本意思唔係搵個純主持嘅主持嘛。
我認，我說話唔夠 smooth（暢順），因為我中文唔叻。節目第一次全部都係硬稿，文縐縐仲要死記硬背，完全都唔係人講嘅嘢。又唔知邊個俾個信念我——唔拎稿有型啲喎，於是盡量唔睇稿，所以咪出事囉。
成個 show現場冇 NG，一路錄落去，森美事後都話：「第一次做主持無端端啃個香港小姐咁大嘅節目，我唔怪你。」
佢咁講，我都唔怪自己啦。
不過好難怪嘅，見我講得一口流利廣東話，普羅大眾又點會諗到我完全冇讀過中文。反而英文字都唔識多個，又扮講中文講到好歪嘅，香港大有人在。
人生地鐵站
事 實上，劉美君似「鬼」多過似人。訪問當日，老外朋友到場探班，你一言我一語，英語，字正腔圓。畢竟從小以英語學習，中文只達小學程度。如果 Stephy（鄧麗欣）一口爛英語，目標是闖荷里活。那麼劉美君千里迢迢由美國回流做個中文節目主持，就算主持得不濟，也是理直氣壯。
尤幸主持並不是劉美君主要工作。劉美君 8歲被發掘做童星，高中畢業後退居幕後，擔任唱片代唱及和音。直至 86年，為《 o靚妹仔》第三集《午夜麗人》唱主題曲〈午夜情〉，唱盡歡場辛酸，街知巷聞。第一張大碟銷量高達 40萬張，一時佳話。
我信係你嘅就係你 o架！舉個例，人生就好似搭地鐵，可以 control幾時 on and off個 station。落車行出街兜個圈再上車都得，係你選擇 o架嘛。
In general（普遍來說），我條路都幾 smooth（暢順），好多機會飛來俾我。學校歌唱比賽，我唔夠膽參加。有時 sign up（參加）咗，臨場 stage fright（舞台恐懼）我會詐肚痛甩底。點知玩吓玩吓，有個哥哥搵我拍廣告，就係咁入咗行。
命運鋪排好多機會俾我，我選擇咗好多，同時亦放棄好多。
早前 TVB有人同我講，當年（ 89年）蕭笙叔有套《天涯歌女》，咪搵咗個唔知咩女仔。本來搵我 o架，嗰陣成班服裝阿姐好興奮，覺得我眼圓圓好古代，好似個角色。
依家見番阿姐，佢仲話：「哎吔，應該由你拍，套劇不知幾紅。」其實冇話應該唔應該，當時我要生女。難到你要我為套劇唔要個女？
所有事物一早鋪晒出嚟，你落車，其他人攞走個機會，冇得怨。個 choice（選擇）同 outcome（結果）係個人決定。
冇拍套劇，起碼有個好乖嘅女，我成功感仲大。
新碟《荊棘皇后》，其中一首歌叫〈雪泥〉。事緣一次滑雪意外，劉美君嚴重受傷，大半年行動不便。自命堅強的她，學懂承認軟弱。
我唔係你杯茶
劉美君口中「唔知咩女仔」，正是陳松伶。同樣是 80年代中期加入樂壇，際遇卻天淵之別。劉美君的震撼，活過 80年代的必定體會過。 18歲嫁給導演黃泰來，兩年後誕子， 22歲以一子之母形象殺入樂壇，大唱〈午夜情〉、〈最後一夜〉等情慾禁歌，成為一眾少年性啟蒙者。
89年，劉美君再誕下一女， 92年跟黃泰來分開，九年婚姻畫上句號。
兩個人分開，冇話啱唔啱。話佢唔啱，我衰；話我唔啱，我又冇理由硬啃啫。
當年跟黃泰來，係因為佢中文叻。最記得我寫〈午夜情〉時，其中一句「不喜說話像冬天」，黃泰來唔明，我哋拗咗好耐，最後我拗贏咗。我叫佢咪理，唔講嘢就好似冬天，唱到今時今日個個都咁唱！
不過無可否認，黃泰來教識我好多嘢。佢當時比我年長，見識自然比我多。依家大個咗，心諗：唓，我都識啦！
後來，劉美君經好友林憶蓮介紹，於○二年下嫁第二任丈夫，兩年後誕下孻女。可惜最終性格不合，○八年離婚。
跟第二任丈夫由朋友開始，相識一年佢向我求婚，我話不如訂婚先，訂咗一排，佢話結就結。
成件事就好似杯茶，我唔鍾意飲，但叫返嚟唔好意思唔飲。唏，飲啦先發覺唔對路，自己真係飲唔落，惟有選擇完結佢。
婚姻唔淨止愛情，整體係建築喺快樂之上。唔快樂，冇人會願意繼續做落去。
劉美君堅稱尹子維只是普通朋友，從來冇拍過拖。記者笑問係咪「散餐」，「嘩，我唔係好散得嗰啲人嚟 o架。」
離婚更好
成人世界何其複雜，大人愛恨分離，下一代只好隨波逐流。據說劉美君爸爸曾有 3個老婆，家中 5兄弟姐妹，後來父母離婚。上一代的故事，劉美君這一代無奈延續。
離婚係一個痛苦抉擇，但 end up（結果）係好事。細個我好希望爹哋媽咪冇離婚，但兩個勉強一齊，我又開心得去邊？一對夫婦發展到貌合神離，子女感受唔到父母相愛，更加受影響。
冇周詳考慮，我都唔會同黃泰來 9年之後先離婚。你估好過癮，結完又要離，生細路哥又有責任！
好在我天性鍾意細路哥，我成日帶仔女去 family trip（旅行）。佢哋早前仲 email問我返唔返美國過 Thanksgivings（感恩節），一家人好開心。
大人離婚，其實只要解釋清楚俾小朋友聽，一樣冇影響。我個仔嘅 relationship（男女關係）仲好過我， 17、 18歲認識現任女朋友，拍拖拍到依家。
我自問比任何一個人更勤奮去做媽咪。作為一個媽媽，我好 successful。
愛是無涯
劉美君經典歌曲數之不盡，那一首最能代表自己？
思索了好一會，劉美君徐徐吐出：「〈愛是無涯〉」。
當年報道，有傳劉美君與黃泰來婚姻不穩，想用孩子綁住愛郎。有說這首〈愛是無涯〉就是唱給黃泰來聽。
經歷兩次婚姻失敗，愛過痛過恨過，是否不再相信婚姻？
「冇話唔信嘅，咁啱我唔 work啫。好情人未必需要係老公，有老公又唔係一段愛情，一紙婚書又保唔到一段關係。」
不再醉臉儍癡癡，昂然起步，今日的劉美君不是儍豬。
