肥媽陳潔靈訪問，力撐謝安琪，諷Twins恰如其份

轉載自蘋果日報

肥媽、陳潔靈　樂壇雙俠寸爆港男

2009年09月26日

陳 潔靈和瑪利亞（肥媽）近日分別擔任無綫《超級巨聲》和亞視的《亞洲星光大道》評判，因其精闢意見而人氣急升，兩位唱家班的事業再逢第二春，下月 20日及 21日她們更會與葉麗儀踏上紅館開騷，工作浪接浪。肥媽與陳潔靈日前接受本報記者專訪，甫見面就攬攬抱抱，肥媽還大笑道：「總之我哋就係背脊插刀啦！」旁 人連忙更正是「兩脅插刀」，逗得陳潔靈哈哈大笑。時代女性，要做好媽媽又要做職業婦女，可謂腹背受敵，還得保持新鮮感挑起丈夫興趣，果真應了肥媽一句「背 脊插刀」。港女點拜金拜物質，詹瑞文笑到爛，港女眼中的港男是如何又聽過未？

撰文：吳佩思

肥媽：香港男人自卑

肥媽、陳潔靈和葉麗儀，名正言順「三個 女人一個墟」開演唱會，加上耀榮叔一句「唔識聽英文」，三人乖乖轉唱粵語歌，不過，英文歌照唱，各種形式 crossover保證令你驚喜重重，還有一個為顧嘉煇及向已故的羅文致敬環節，有些歌，你想像不到她們會唱，更想像不到她們會這樣唱，陳潔靈如是說。

麻甩佬　自卑要面

想 像不到是今次三大天后要唱男人。始作俑者是肥媽，一講起男人，她滿肚鬱氣說：「冇女人去講男人，搞到女人地位好低，好似成日要我哋啲女人去迎合男人，點解 唔可以要男人迎合我哋？佢哋成日喺度講吓港女，咁就賺錢 o架喇，咁樣好唔公平。我覺得香港女人其實好勤力，我哋呢一班都係刻苦耐勞，係大大大大大大大長今嚟 o架大佬。既要做現代嘅阿媽，又要做現代嘅太太，又要做職業婦女，我唔夠膽講話第二啲女人冇，但如果成日話港女港女咁樣好唔公平，所以希望畀個機會我哋講 吓啦，淨係得你班麻甩佬講女人 o架？」

肥媽一輪嘴，中間唔使唞氣，繼續數：「香港男人要威，又有啲自卑喎，因為男人要威，我娶個叻女人返嚟點得 呀？點解你唔識欣賞呢個女人喺屋企一樣可以咁成功，係因為你哋冇畀機會我哋！部份男人淨係睇女人嘅年紀身材同外貌，日日都話 18歲卜卜脆，我日日畀個 18歲你吖嗱，冇思想吖嘛！點解男人鍾意去拈花惹草呢？因為男人鍾意你呃佢，仲停留喺女子無才便是德，仲想三妻四妾，你有本事養晒咁多個你咪娶囉，但家 又唔係喎，冇咁着數 o架呢個世界！」

恨前夫　另結新歡

肥媽（右）近日擔任亞視《亞洲星光大道》評判，因意見獨到備受觀眾贊同。

肥 媽一講起香港男人就火起，轉台講老公，即刻眼濕濕。無他，第一段婚姻發生在 18歲，一時衝動嫁給年紀比她大 20多年的丈夫，他生意失敗後就留在家中專心鬧情緒，肥媽二話不說獨力帶大 6個仔女，其中 4個更非由她所出。由做苦力在上環抬麪粉、餐餐豉油撈白飯捱到做酒廊收銀，何止撐起半邊天，偏偏丈夫嫌她在家中太霸道，另覓新歡離婚去也。

直至 99年肥媽才遇上現在的丈夫阿 Rick，從前得不到的幸福，今次一鋪過連本帶利收番，她說：「我家好開心，我啲仔冇咗爸爸嗰十幾年，我老公 Rick幫佢哋搵番出嚟。」

之前提過，肥媽年輕時一時衝動結婚，其實少女 Maria本有一個青梅竹馬的拖友仔，初戀，還訂了婚。有次兩人狠狠吵了場架，少女 Maria一時意氣取消婚約，還未想清楚便嫁給另一個男人。蠢，真蠢。

講初戀　泣不成聲

年 屆 55歲的肥媽顛簸半生，從冇到有，根本無暇懷念少女情懷，偏偏是陳潔靈挖起她心底最深層的感受，皆因肥媽提議闢一環節講男人，陳潔靈就提出在另一環節講女 人，還要求兩位拍檔回憶心路歷程，結果肥媽一想就想起初戀，泣不成聲，她說：「初戀幾乎唔記得啦，但係我一生真係因為咁而改變，真係一時之氣，邊有人咁拗 氣，我喊係為乜嘢呢？我未試過覺得自己蠢，唔知係咪自己個人老咗，我以前成日同人講：『車，咁又點啫，我衰得起呀！』今次係第一次，我諗起第一段情會喊， 50幾 60歲，未試過，然後第一次鬧自己蠢。」

陳潔靈：崩潰中學習復原

陳潔靈丈夫張耀榮 6月病逝，現在的她神氣清朗，傷痕從表面上看不出，並非故作鎮定。丈夫離世剛好三個月，陳潔靈上月在台灣賑災活動上還激動痛哭，但她已從崩潰中慢慢學習復原，由唱歌到禪修，一天一點進步。

禪修控制情緒

陳 潔靈說：「或者到時會喺台上面講吓一啲好個人嘅嘢，其實觀眾係八卦嘅，觀眾容易有代入感同親切感。今次對我嚟講，係一啲難控制嘅情緒，咁個情緒唔可以話 『喂，我到時先算啦！』今次唔得。

而家呢個時候你要將自己訓練到唔係機器，係有啲嘢，因為你一定要令你記憶嘅層面經過、試過、做過，咁個人就唔會咁容易喺 個崩潰邊緣。因為始終觀眾係關心你，唔係想睇你崩潰，總之生理上心理上都要有預備，真係要自己每一日都要試過，絕對唔容易。」

現在陳潔靈學習禪修，令情緒得以平復，也藉着這種學習，令她得到一些從沒體會過的感覺，她說：「禪修其實令我睇到好多嘢，無論你個人點樣好、點樣樂觀，有啲突發嘅嘢真係好難接受，禪修就係令到我哋基本個人寧靜、平靜，同埋知道人生究竟係乜嘢一回事，然後學習接受。」

自嘲井底之蛙

陳潔靈續說：「我以前都覺得自己好樂觀，但係當我去探索好多嘢嘅時候，我會發覺自己其實係井底之蛙。以前以為好多嘢唔係一就係二，唔係二就係三，原來仲有四五六，但我哋從來都冇睇過有四五六，咁你一定要發掘咗佢，先發現原來人生入面嘅境界係咁闊嘅。」

講起陳潔靈與肥媽，很自然就會聯想到無綫《超級巨聲》和亞視《亞洲星光大道》，兩位好姊妹打對台分別任兩個節目的評判。
肥媽表示沒有看過《超級巨聲》，陳潔靈一味讚各評判意見中肯，獨愛來自台灣的陳珊妮，談到肥媽，她笑道：「肥媽我就費事講啦，太擦鞋喇。」

慨嘆比賽變質

陳潔靈擔任《超級巨聲》評判不久，有人讚她一矢中的，有無知網民人身攻擊罵她「死老公唔係大晒 o架！」陳潔靈是知道的，沒有動氣，她說：「我等咗好耐先有一個咁樣嘅歌唱比賽，我都係歌唱比賽出身，有段時間我覺得有啲歌唱比賽好嘥氣，個個人都唱半 段，又要你踩單車唱，真係離晒譜，真係突然間有一個咁正式嘅歌唱比賽，對呢班後生仔嚟講係一個好大嘅機會，我希望佢哋可以好好把握，進步多啲，亦希望佢哋 明白每一樣嘢都有代價。」
《超級巨聲》參賽者須過五關斬六將，壓力之大非外間所能想像，陳潔靈眼看他們一點一點地變，亦愛莫能助，她說：「佢哋做 做吓嘅時候已經忘記咗點解要報名參加比賽，個 focus集中錯咗地方，佢哋有時會集中咗喺個包袱度囉，譬如人哋點樣睇佢呀、好多是非呀，啲媒體點樣寫佢呀，成件事已經變咗。個節目太長喇，始終又變咗 個騷。我第一日見班參賽者，就同佢哋講，諗番自己點解要參加比賽，額外嘅包袱，掉咗佢，但係你知道啲後生仔好難做到。」

陳潔靈鼓勵《超級巨聲》的參賽者，應把握機會，不要理會是非包袱。

-為謝安琪走音抱不平-

謝安琪走音失準，陳潔靈撐她是壓力所致。

話 題轉到近期多次失準走音的新紮天后謝安琪（ Kay），早前有網民將她的走音片段拼湊在一起，還加插肥媽在《亞洲星光大道》的抵死評語，有人大呼過癮，陳潔靈為 Kay抱不平說：「一個人幾叻都好，尤其講緊除咗生理，仲要思路，好多嘢係相對，例如佢人生體會唔夠多，個腦唔夠安靜，就會力不從心，然後就躁、緊張。 家你講緊好高技巧嘅嘢，你對佢有要求，碧咸都會射失 12碼啦，但佢喺緊要關頭冇射失嘛！」

陳潔靈指 Twins發展很成功，是嘲諷還是稱讚？

陳潔靈繼續力撐 Kay：「佢太攰喇，而且要承受壓力太大，根本心理上同生理上個包袱好重，啄住佢係好唔公平。佢越多表演嘅節目就越容易出錯，筋疲力盡，佢真係忙到仔都冇時間湊，聲都乾晒。」
由 謝安琪扯到時下歌手走音甩嘴忘記歌詞樣樣齊，肥媽對此說：「而家唔係歌手，係偶像，係搵錢機器，有啲係公司簽咗佢先學唱歌，你好難令到佢係真係唱歌技巧 好，唱歌同練功一樣你都係需要時間，所以我贊成所有電台電視台搞歌唱比賽，能夠發掘多啲真係可以做歌手嘅，最好乜都比賽，咁就最好喇。」

陳潔靈也說：「世事係一種淘汰賽，好似 Twins咁，我覺得佢哋好成功呀，如果唱得太好太 OK， 13歲嗰啲跟唔到呀，家咁樣就叫恰如其份。」