而同一天蘋果日報亦有其專訪，現節錄部分如下：
男生圍：李家仁踏上小明歡笑路
其實《小明上廣州》是《小明坐火車》的延續篇， 01年推出時曾引起一時佳話，也讓人知道李家仁是實力偶像派兒歌歌手。提到為何有衝動整首廣州版？李家仁哈哈笑說：「小明坐咗好多年火車，我同韋然話：『喂，整番首小明啦！』當時佢唔鍾意，唔想咪由佢先囉。 05年開始我好多時候返廣州過年，咁之後又亞運，廣州唔同晒，我話係時候整番首廣州啦，真係出咗嚟。」《上廣州》歌詞最抵死肯定是 rap的一段，甚麼「入實驗室 㩒緊急掣」、「一蚊一隻雞」的 old school急口令盡出，令人聯想起撐粵語；至於「唔做河蟹打橫嚟」更被視為有政治意思。李家仁依舊哈哈笑說：「呢個其實冇乜嘢政治意識嘅，唱隻歌仔咋嘛，使乜咁緊張呢？曹雪芹寫《紅樓夢》都未必咁多嘢諗啦！」
李家仁不諱言年幼時已打算做歌手：「發吓夢唔得咩！」中六時讀聖保羅男女中學，膽粗粗報名參加歌唱比賽，唱完第一段就被人叮走冇得留低，他清楚「真係唔得喎」，於是發憤讀書考進港大讀醫：「呢條路唔通，就去第二條路囉！你要知道你能力所限，明明做唔到，係都要去做，咪盞做一世配角、茄喱啡囉！」
唱出風格老婆潑冷水
現在的李家仁也算是當紅歌手，多了人關注及抨擊，他也想過搵老師學唱歌，「可以唔使太難聽」，不過同事卻認為多此一舉，他說：「啲人接受你就接受，唔接受你唱成點佢都係鬧你。唔需要刻意追求劉德華呀、張學友呀，因為佢就係佢，你就係你，呢個就係李家仁風格。」雖則如此，李家仁也不時被老婆扭耳仔：「老婆話你仲唱乜鬼嘢吖，一把年紀！我都俾老婆鬧慣 㗎啦，咪又照做，吖竟然 hit咗喎！」那老婆可有改觀？李家仁擰晒頭裝出一臉垂頭喪氣樣說：「唉，冇啦！平常心呀，你估你真係歌星咩？我咪又係我！」笑聲響徹全房。
李家仁又預告快有新歌出籠，就是《小明過新年》供 fans獨家試唱，至於《小明上東莞》更隨時 ready。他說：「因為我要返鄉下 o架嘛，你唔返鄉下，啲鄉親父老唔係好 like 㗎嘛，佢哋會話『喂，你有冇搞錯呀？淨係去廣州，唔返東莞點得？』」那到時可會給太太過目呢？李家仁說：「未俾人鬧過呀？梗係冇啦！」說罷又一輪喪笑。
回帶閱讀：小明上東莞？李家仁韋然陸續會有小明系列