轉載自十二月十一日蘋果日報
人生豈止如戲，對於填詞人林敏驄和潘源良兩位超級球迷來說，他們更覺得人生像一場球賽，有機會時不斷盤球向龍門衝過去。不過球賽也有中場換人，現年 51歲的阿驄和 52歲的阿潘一度紅遍填詞界， 80年代作過不少經典金曲，中場休息過後，兩人的作品買少見少，不過近日歌神陳奕迅（ Eason）慧眼識英雄，誠邀二人復出詞壇再發力，現在宣佈，阿驄和阿潘精采的下半場正式開始！ 撰文：比華利
林敏驄： Eason兩公婆跪地求我
Eason）新碟《 Taste the Atmosphere》，不得不豎高耳仔細味出自潘源良和林敏驄手筆的《超錯》和《葉問風中轉》。樂迷和網友在討論區留言，指這兩首歌初聽礙耳，卻越聽越正，完全流露着二人獨特風格，由靚聲王 Eason演繹，簡直天衣無縫，正好顯示阿潘和阿驄的絕頂文字功架。
一度陷於停產
阿潘和阿驄是 80年代金牌填詞人，作品令人耳熟能詳，二人在樂壇的表現如一場球賽，上半場表現精采，中場卻被換出，一度離場停產，瓣數多的阿潘甚至撈埋足球評述員，阿驄則曾北上從事音樂創作，近年才回歸活躍幕前。
全靠 Eason的誠意加銀彈，讓阿潘和阿驄重出樂壇作戰，養精蓄銳後，愛搞笑的阿驄食正葉問潮填了《葉問風中轉》，當中的「遇宗師遞熱茶，平日來為師父通淋巴……內心怎亂如麻，情願如情感的儍瓜……」聽得人會心微笑。
阿驄說《葉》花了僅兩天便完工：「寫歌要有題材，題材要賺人熱淚，唔係點突圍而出？我發覺呢排有個現象，套套戲都拍葉問，又甄子丹、又彭丹、又王丹，跟住又多個梁朝偉，證明葉問好 hit，咪搬上歌度。」 Eason雖然唔識武功，但勝在有唱功，演繹出另類葉問，風頭不遜甄子丹。
阿潘的《超錯》也受樂迷歡迎，當中帶着政治隱喻：「美麗到最後變醜陋，不要假裝作好朋友，你若有理會我感受，記掛我不要講出口……」揶揄政府的「起錨」行動。阿潘早年舊作《十個救火的少年》，諷刺港人政治冷感也非常到肉。不過阿潘拒承認《超錯》的意思：「呢啲嘢任我講， Eason畀首歌我，聽完 melody就寫，唔寫呢啲真係唔知寫乜。」
陳奕迅擲銀彈
究竟怎樣促成 Eason與阿潘和阿驄的合作？阿潘的答案如他的詞一樣帶點隱喻，他語重心長說：「香港地寫歌詞得幾個人有牌，有牌咪有得做。」阿驄即和應：「冇牌冇得做，有牌就有排做？」阿潘續說：「冇牌間唔中要等啲大狀『假釋』，今次 Eason呢個大狀幫我哋假釋，交咗保釋金就可以寫兩首歌。」
阿潘用「假釋」作隱喻，似要揭示樂壇陰暗面，阿驄抵死回應：「天大地大，講到個門口咁細。」性格樂天的阿驄卻乘機揶揄 Eason和徐濠縈：「佢兩公婆嚟我屋企『翳』我，仲跪喺地下，一個『翳』我買衫，一個『翳』我寫歌，搞到我幾日唔敢出街。」
話題轉到 Eason時，阿潘和阿驄有默契地棟篤笑一番，問阿驄可覺自己是助 Eason更受歡迎的功臣？他說：「我係功臣，佢係公公（笑指潘源良）， Eason喺當今樂壇最有 power。」阿潘說：「淨係得佢有 cash，不過我哋假釋嘅，轉頭又入返去，下次要等另一個大狀再同我哋假釋。」問 Eason邀請二人出山，有否大放銀彈？阿驄直認不諱：「唔係邊有興趣做？」
那 Eason出手必很闊綽？阿潘和阿驄相對一笑，然後阿驄說：「啲歌有歌詞好聽啲，歌詞係點睛，歌詞將靈魂注入，歌詞係歌曲嘅代母，好似借種咁，將靈魂直接注入體內，所以好貴。」
或會互相寫歌
對於時下填詞界是林夕和黃偉文天下，阿驄搞爛 gag說：「全部唔係我對手，因為我對手（指自己雙手）喺度，我唔喺度批評別人。我欣賞自己，同阿潘惺惺相惜，因為佢今日喺度，佢唔喺度，我就講第二個。」阿潘則說：「各有各好，唔好唔會講，講名讚好或批評都唔好。」
阿潘和阿驄相交近 30年，要他們為對方度身訂做一首歌，反而考起阿潘：「寫乜嘢？好辛苦囉，好難寫。」阿驄則很有興趣：「等我度吓先。」若然真有這兩首歌，樂迷屆時又有耳福了。
攝影：林德雄