吳若希的爛天空開了一個洞

藍天空

吳若希

廠牌：星煥國際| 評分：0.5

你的評分

[starrater tpl=10]

單靠文字，我一直以為吳若希是吳日言或是林日曦，一直不知道是何許人。當知道「吳若希」在某唱片銷量榜拿了第一後，我便決定親耳認証這一個星煥旗下的香港女新人吳若希。

點知，呢舖真係將本人的弱小心靈完全傷害，全因我見証了香港樂壇的新低點。

二十歲靚靚女女的吳若希，其實可以不過是另一年輕甜美女歌手，唱一些流暢可口的catchy 流行曲，大家都會開心收貨。不過，【藍天空】全張碟，坦白講，沒誠意，沒創意，沒質量，沒深度。我在十一首歌曲中選擇不到任何一首可取，或者，陳輝陽的輕快作品《若要人不知》及《即興地圖》已經叫全張碟最「前衛」、最可口的作品。林夕寫的「從來暗戀只有自己知 享受最曖昧時」的歌詞，也未免太噁心了吧？同時，喂，陳輝陽呀，我地在講曾經係香港樂壇的救贖的陳輝陽。這樣兩首玩點電子音效，玩點老土日式流行曲的叮叮噹噹的行貨，真的對得著良心？

另一首或者係K歌複製的《我沒有傷心》副歌亦叫我深刻，因為似《高妹》，亦似鄭融的K歌。外間反應良好的《第一天失戀》全靠黃安弘寫得用心的旋律，或者早幾年的容祖兒亦會選唱這樣的K歌作品。最得人驚係翻唱七十年代已出道的竹內瑪莉亞的作品，即係梅艷芳的《裝飾的眼淚》，清楚表達咩叫人歌分離，係咪想激嬲竹內瑪莉亞或者想叫梅艷芳激返醒？

坦白講，吳若希聲線其實不錯，雖然講求咬字清晰的人一定會不喜歡她，其辨識度亦不高，有點像鄭融，但問題不在於她唱不唱得，而係整個專輯製作惡劣，毫無誠意。除了充斥著悶到爆炸的K歌之餘，除了mixing hea到不能再hea之餘，除了連吳若希絕多演繹都有「好似唔想唱」的感覺，某些歌以衰過唱K的甩拍表現之餘，便沒有任東西留給聽眾。

或者你會話筆者老啦，呢張唱片係留畀十歲的小學生的。呸，十歲小學生都deserve好的流行曲，這樣劣質流行曲與荼毒年輕人，有什麼分別？流行音樂可以很商業化，但同時亦要顧及品質及良心。問心，整張專輯最精彩的，原來是封面那張相，簡單，亦影得吳小姐幾靚又有個性，難道就係因為咁而成為銷量榜冠軍？這樣新一代的香港流行音樂，香港樂壇仲點有希望？

全碟歌詞