大富翁的煩惱 麥浚龍

轉載自蘋果日報

大富翁的煩惱 麥浚龍

2010年04月21日

拍過數百套 AV的蒼井空,長居日本 AV女優人氣榜三甲,童顏巨乳和真正如假包換的 G奶一早俘虜全港宅男寂寞的心,大名連我等師奶都早從男同事口中聽過,沒想到與她合拍完電影《剖術者》又在個人 MV〈超生培慾〉
中為她寬衣解帶 的麥浚龍竟說,在此之前,既沒聽說過蒼井空,更是從沒看過一部 AV。
父親是中建電訊集團主席麥兆棠,哥哥麥浚翹旗下有唱片公司、週刊和服裝生 意,家底雄厚又有哥哥全力 backup歌唱事業,別忘了穿的用的都快人一步、閒時設計自家品牌服飾 Chapel of Dawn賣到去巴黎、倫敦, Juno還有一個至尊潮人的身份。

別人夢想得到的, 3月才滿 26歲的麥浚龍早就應有盡有,不過,他竟不覺得與宅男女神有肌膚之親有甚麼好羨慕,亦不認同自己的成就建立在金錢基礎上:「由入行開始,我一直使自己搵嘅 錢,我可以話 你聽,有一個富有背景嘅人入呢行,困難絕對比任何人多……」

包括上週受訪、因病入院手停口停要撲水交屋租的洪卓立在內,在我的世 界,大家的困難往往都來自錢, Juno的「煩惱」,恕我感受不到。不過,看着面前一身日牌 N.Hollywood、戴着眾多收藏之一的 7萬大元 Jacob& Co手表和尾指套上數萬鑽戒的 Juno……我不明白的是,使自己錢也好,花老豆家底都好,有錢可使是件幸福的事。如果我是麥浚龍,我恨不得次次訪問都大大聲講:「我老豆大把錢、我係好 有錢,有乜錯?」講到尾,娛樂圈有錢固然好,有實力更可敬,我眼中的麥二少,一個用心做音樂的人,有錢有實力,簡直雙贏。有錢怕乜認?偏偏佢最怕。

見蒼井空多過見阿嬌

本週即將推出新曲加精選《 Nothing Lasts Forever》的 Juno下半年動作多多,除了客串何超儀的《維多利亞壹號》外,自己主演的三級片《剖術者》亦將於 7月上畫,同時為年尾的跳舞專輯密鑼緊鼓籌備中,新剃的打斜雞冠頭就是為新專輯造型而設。先後在《剖術者》和〈超生培慾〉 MV中與蒼井空扮演情侶,後者意識大膽更有蒼井背部半裸演出,推出一週 YouTube點擊已經直迫 20萬, Juno說不久前才與蒼井在日本飯聚,見面多過盛傳復合的緋聞女友阿嬌。

《剖術者》我同蒼井空飾演一對情侶,係一個有關一對弱勢小情侶由復仇到反 復仇嘅故事,是我忽發奇想的一個小點子,同導演黃精甫由傾到成為劇本,再喺同何超儀一齊拍《維多利亞壹號》時,喺飛機講起呢個話題,佢決定由佢嘅 852電影公司投資成事。《維多利亞壹號》都係黃精甫嘅故事,本來個角色係搵我拍,遇着金融海嘯,本來個老闆唔肯再投資,由我 line up搵到超儀,成為佢間電影公司頭炮電影,條件係,個主角由男變女,由超儀自己做番,我冇所謂。

蒼井空嘅角色,需要裸露、暴力,同唔少情慾鏡頭, 我好頭痛,香港邊個女演員肯做呢?結果黃精甫諗到蒼井空。我從來冇睇過日本 AV,亦冇識嘅朋友會分享 AV畀我睇,淨係沉迷嗰種賣弄喪屍、血腥嘅美國 B movie。到黃精甫提到蒼井空,至第一次上網見到蒼井空嘅相片……純粹佢嘅泳衣嗰啲。

每個人都有過去,我唔會因為佢拍 AV出身用唔同眼光睇佢,不過,始終溝通有問題,發展落去?應該唔會……好多男性羨慕?我唔知,身邊亦冇人咁同我講。

02年出道時,長的不高大( 165cm)、五官也被同年新人余文樂甚至蕭正楠比下去的 Juno,因為獲得唱片公司環球力捧、宣傳鋪天蓋地, fans人多勢眾又湊巧父親財雄勢大成為攻擊對象。約滿後加入哥哥成立的 Silly Thing後,努力練大隻做潮人,音樂愈玩愈偏鋒,憑〈雌雄同體〉和〈弱水三千〉分別於 05和 09年勇奪叱咤專業推介第 9位後,音樂事業終於見到成績之餘,亦有外界評論,自家公司和傳媒全力支持,又有錢請來樂壇夢幻組合度身訂做,成功理所當然。

王雙駿、林夕、黃偉 文、周耀輝,呢啲名字喺好多歌手作品中都會搵到,點解到 Juno用,就會覺得特別貴呢?係咪偏見,我冇乜所謂,但希望大家平心而論囉。

我連唱首 〈弱水三千〉,都聽到一啲評論係, Juno冇經歷過就唔應該唱。首歌講輪迴,有邊個經歷過輪迴啫?我冇所謂,鍾意乜嘢,大家有大家自由,我唔會迫你聽。

有 一個富有背景嘅人入呢行,困難絕對比任何人多,超儀係一個好好例子。我唔會執着邊部分嘅困難,我唔會到處宣揚我邊年邊月邊日遇上咩困難,總之,我都經歷 過。

舊年我同時拍緊《剖術者》又要為《馴龍記》配音,一套係三級片,另一套係拍畀小朋友睇,我不停打咗七個鐘「司憶」,精神科醫生話我係過度精神 緊張導致腸抽筋,結果要食精神科藥。我記得啱啱入行時,我都過分喜歡沖涼,最高紀錄一日沖八次。我唔知咁算唔算病態……我從來唔睇外間新聞,從來唔知出邊 點樣評論我,但壓力嘅嘢,我諗自己意識得到,反而唔算嚴重。

我搵到,所以捨得使

03年至潮玩意售價 4萬的 SEGWAY電動車, 19歲的 Juno是全港最快買入的潮人。

自從慾照事件陳冠希「無限期退出」香港娛樂圈,潮人地位自然讓同樣有自家品牌潮服、由頭到腳不是 獨一無二就是 crossover限量潮物的 Juno頂上。出道不久就擁有價值 50萬全新保母車王、考完車牌即買 203萬 Audi R8代步、喜歡收藏名表就獲 Jacob& Co設計師贈予獨一無二值 20萬鑽表、漫畫相機書籍影碟收藏塞滿獨居的服務式公寓,閒時獲相熟設計師誠邀參觀日本、巴黎 fashion week,既然有錢又有面,興趣再多也不成問題。

我哋兩兄弟都唔係繼承父業,哥哥喺日本讀書,跟住開創自己事業,冇靠爸爸打本,我 16歲已經傾緊簽環球, 18歲入行,從此以後都係靠自己,除非食屋企飯都計啦。我都唔算有咩奢侈品啫……呢隻表唔係好貴( 7萬),隻戒指都只不過幾萬蚊。我家架車幾多錢唔想講,自己搵到嘅錢自己使好正常。

我唔係大家眼中咁寫意,都係搵食啫。我唱歌、拍電影、寫劇 本,做我嘅時裝,家我嘅品牌( Chapel of Dawn)喺台灣、巴黎、倫敦、墨爾本都有得賣。搵到幾多我唔講,但真係幾好賺,夠我生活,仲夠我去開創其他事業。
大家都要搵食,大家賺錢多少唔 同,錢嘅使法都唔同。有人買衫、有人買表、有人買樓、有人買車、有人買書、有人買碟,每個人都有自由……
我工作咗咁多年,頭嗰幾年好辛苦……當 然,家庭背景對我影響好大。不過,咩工作都會辛苦,咩行業都會遇到難處,我做呢行,所以我難處透明度會特別高。

好多人覺得,有錢最寫意,有錢唔使 做……真係唔使做,我出道第二年,已經大可以離開呢行。係唔係努力過……我唔係一個講嘢叻嘅人,所以我選擇做畀你睇。〈弱水三千〉同〈雌雄同體〉攞到叱咤 十大,我真係好開心,因為鍾意我音樂嘅人,就自然明白、自然認同。

假的真不了

07年尾合拍《破事兒》合演夫妻後,即傳麥浚龍憑短訊和 禮物攻勢冧掂鍾欣桐, 08年頭發生的慾照事件,更讓兩人關係大躍進,有傳阿嬌在麥家深水灣大宅避世、阿嬌出事 Juno再三力撐藐爆陳冠希更是患難見真情,兩人兩年來不時又分又合更一度傳出婚訊。

Juno自稱,上次拍拖是與中學同學,一起兩年於一年多前分 手:「我唔認同用物質追求女仔,我送過畀女朋友最貴嘅禮物,亦只不過係個幾千蚊嘅日牌手袋……佢復出做 TOUGH代言人話我介紹?更加係大笑話,總之,我同阿嬌就係朋友咁簡單。第時我結婚一定會話畀大家聽。」
經歷劉華和 Sa基事件,不知道還剩多少市民會把「結婚我一定會公開」這種話當真?

處男碟《 On The Road》宣傳鋪天蓋地又開金唱片祝捷會,但盛傳實質賣 3,000, Juno與當年環球伯樂陳少寶(左)更曾捲入轟動娛圈的舞影行動。

胞兄麥浚翹年長 Juno 4年半,是圈中著名潮人,旗下唱片公司 Silly Thing近年更只剩下 Juno一個藝人。

在《破事兒》中與阿嬌結婚生仔, 26歲 Juno說現在最大心願就是生孩子。

撰文:朱小博 攝影:黃家活

Leave a Reply

Your email address will not be published. Required fields are marked *