【音讀】港台,能利用搞Pop Poll的資源支持本地獨立音樂嗎?

看到朋友面書轉貼本地「新」樂隊Modern Children獲得港台的Pop Poll「全年最受歡迎新人或組合」提名,更說是唯一本地樂團能夠獲得提名,睇落就似是值得高興,但我就睇到真係谷氣。

點解谷到一肚氣?當然,唔關Modern Children事,一隊新樂隊有咩傳媒就咁提(下)個名(唔駛提名),都一定會高興並感激架啦,醜角就由我地來做啦。

第一,整個program根本是一大笑話。首先最可憐亦最尷尬係,最受歡迎十大國際歌曲當中,先係將Lady Gaga等一眾Mainstream Pop songs中,竟然放個Radiohead 的Lotus Flower落去?係咪搞的人覺得點都要放個「神級樂團」落去會自我感覺良好?最簡單連歌曲類型都搞唔清,你究竟想投咩歌?定係你仲以為Radiohead仲唱緊Creep?

其次,我真係唔知Rubberband 或恭碩良為自己能夠同Radiohead同Coldplay平起平坐放在同一「國際金曲」之中,係幾咁尷尬?唔贏還好,贏了真係唔知拎唔拎好,其實同普京被獲頒孔子和平獎一樣,有冇分別?

當然,諗返港台向來鍾意搞呢種無聊玩意,眾所周知大陸唔紅的容祖兒年年都會在港台贏全國最受歡迎女歌手,贏張靚穎等等,點解港台作為一個官台要咁做?我真係諗唔明。唔通係要同容祖兒一齊自我良好到呢個地步?

第三,港台,你作為一個官營電台,究竟你有推動過本地音樂發展嗎?能夠直接支持本地獨立樂隊嗎?難道你認為你放Modern Children或恭碩良去同Lady Gaga 同一排名就叫係幫左佢地一把嗎?這就係你對本地歌手的認同嗎?你既然有呢個資源去搞一個「國際盛事」,咁不如幫下本地獨立音樂係咪仲好?

第四,思想停留八九十年代,什麼叫「最受歡迎金曲」,「最受歡迎男歌手」(英文更驚,GOLD SONG)?你地可唔可以改下一d 已再冇意思的用語?

其實由中文金曲頒獎禮開始,我哋已經知道港台係不思進取。咁多年來,你仲花公帑搞一個根本冇人care冇公信力的頒獎禮,做同TVB或商台一樣的Show,意義何在?其實港台有冇真係諗過點樣可以幫助到香港樂壇?點解咁多年來,903都有幫助獨立音樂,你地仍然係鍾意播你地的衛蘭?

最後,最重要的,就係整個program毫無意義,搞一個投選「最受歡迎」的國際流行曲,目的何在?自愚之餘更浪費公帑。這個Pop Poll,更原來已搞了廿三年,唔講唔知,更原來係「一年一度的國際流行音樂盛事」。唉,既然港台鍾意將本地單位同國際單位接軌從而自我感覺良好,我就將港台同BBC比。BBC其實向來亦被批評為保守,播放歌曲重重覆覆。但至少,近年BBC在不同電台選用不同的Music List方法播歌,刻意在BBC 1裏選擇一些新歌及較少人認識的作品播,就已係一個進步。十年前搞了一個BBC 6 Music的數碼電子新頻道,幾年前的BBC Sound亦成為英國音樂圈子一個Talent Scout及樂壇指標的地方,James Blake就係由呢度出來。

港台呀港台,你幾時醒下,與時並進?

(註︰【音讀】乃是本站全新音樂專欄,專針對香港樂壇奇難雜症,希望鬧得大聲,有人關注,從此幫助康復)

3 Replies to “【音讀】港台,能利用搞Pop Poll的資源支持本地獨立音樂嗎?”

  1. 其實港台中文歌曲龍虎榜既冠軍歌
    係四台入面最多唔同歌手有冠軍
    近年如《天梯》《無忘花》《愚公》都係只得港台願意比冠軍

  2. 對待港台,認真你就輸了
    而且我唔知點解又係度抽容祖兒水

  3. 其實呢個網D評論一向都好垃圾,點解你地仲可以生存既
    3c music呀3c music 你地幾時先可以摺埋唔好影響香港樂壇和諧啊

Leave a Reply

Your email address will not be published. Required fields are marked *